تعمل اية لو عرببتك اتسرقت ؟
تعالى اقولك بأسلوب بسيط اولا : بتروح تعمل محضر فى القسم اللى اتسرقت فى دائرته العرببة.
فى ناس بتتوقف لحد عمل المحضر !.. ودا لو كان صح بس مش اصح حاجة فى الدنيا. :)
امال أية اصح حاجة ؟
اصح حاجة، حضرتك هتاخد رقم المحضر اللى عملته فى القسم ولو استنيت يومين تاخد صورة رسمية منه من النيابة.. المهم تاخده وتطلع على المرور تعمل حاجة اسمها " إشارة نشر " (بص مخبيش عليك المفروض القسم هو اللى يعمل دا بس احنا عارفين انشغال الشرطة :) ) فدور ع مصلحتك بنفسك !المهم إشارة النشر دى معناها انك بتنشر علي كل أجهزه الحاسب الالى الخاصة بالشرطة في مصر ان عربيتك اللى نمرتها كذا مسروقه،
و دا إجراء فائدته ان لو العربيه وقفت في اي كمين وضابط المرور استعلم عن النمر هيعرف ان العربيه دي مسروقه و بيانات صاحبها ويقدروا يوصلولك، كمان من ضمن فوائد إشارة النشر ان لو العربيه وجدت فى اى مكان وراحت اي قسم علي مستوي مصر هيقدرو يوصلولك. :) أو لو اللى سرقها عمل بيها أى جريمة يبقى دليل أن مش انت اللى عملت الكارثة دى..
فى حاجة كمان وهى انك تروح للمرور التابع له رخصة عربيتك وتوقف التعامل علي العربيه بأي شكل
ودا ميزته ان لو كانت الرخص فى العربيه وقت السرقه ممكن الحرامي يزور توكيل ويبيع العربيه لمشتري حسن النيه ساعتها انت بتدخل نفسك في دوامه لانه ممكن يروح ينقل ملكيه ومحدش يفحص التوكيل اللى معاه ويطلع رخصه بأسمه لكن لو موجود في ملف العربيه جواب بوقف التعامل عليها ساعتها أي حد يروح يعمل رخصه هيتمسك والعربيه هيتم التحفظ عليها ويقدروا يوصلولك برقم المحضر.... ملحوظه أخيره .... خليك حريص وانت بتعمل اي محضر انك تسيب رقم تليفونك في المحضر نفسه عشان يقدروا يوصلولك بسهولة :)
ملحوظة كمان : لو طبعا مركب جهاز تتبع بيبقى ليها إجراءات تانيه خالص ودى هنتكلم عليها فى البلوج القادم بإذن الله
دمتم يا رب دايما بصحة وأمان
ليست هناك تعليقات:
إرسال تعليق